الاسم: mohammad omar

الدكنجي…!

19 تشرين ثاني, 2007

أحيانا ينتابني الملل واشعر أنني “انوي التزهزه”، فاختار المرور بـ”دكنجي”، الحارة، ابو نعيم مزودها بالصابون والأخبار المحلية والعربية والدولية…

ورطت نفسي أول من امس في دورة لتدريب الصحفيين العراقيين، وقد أرهقتني تدريبا وتحضيرا، ولم اعد قادرا على التفكير ولا على التجميع، يعني ما “بجمعش”، لذلك لم اقرأ صحف أمس أو اليوم ولم أشاهد أو اسمع الأخبار لا على التلفزيون ولا على المحطات الإذاعية.

قلت في نفسي لما لا اذهب عند “ابو نعيم” واستقي منه الأخبار علّه يزودني بها اضافة الى علبة “الجيتان”، وهكذا اسير على هدي لا على ضلالة، خاصة وان الانتخابات النيابية ستجري غدا.

بعد الصباح وعلبة الدخان، دعاني “ابو نعيم” السبعيني لكاسة شاي، فوافقت على الفور فهذا هو مقصدي أصلا. وما ان جلست وصب “ابو نعيم” الشاي في كاسة “ملتحة”، حتى سألته:

- شو الأخبار اليوم يا ابو نعيم؟

- لا ابدا ما في شي جديد، بس سمعتلك انه الحرامي الي نط ع دار ام سمير، طلع الزلمة مش حرامي.

- كيف يعني مش حرامي يا ابو نعيم؟؟

- يا سيدي هذا طلع بلفيّ على ام سمير، وزي ما بقولوا في الحارة، على ذمتهم انا ما بحط بذمتي، انها المرى عشقانه وانها بتعطيه مصاري وذهب، وبتقول لابو سمير انهن نسرقن، يا حرام يا ابو سمير، عامل زي ثور الله في برسيمه، وما هو داري وين الله حاطه، الي بدري بدري والي ما بدري بقول كف عدس.

×  طيب شو الاخبار الثانية، بعده جارنا ابو حسام مرشح للانتخابات؟؟

* يا رجل، وحد الله، ما هي مبيوعة.

× شو هاي المبيوعة يا ابو نعيم، وكيف مبيوعة؟؟

* يا رجل، قال انتخابات، قال. اي ابو حسام مر عندي امبارح في الليل وهو مروح من الشركة. وقال لي انه انسحب. يا سيدي الحكومة مزبطة حالها والاسماء الناجحة صارت في جيبتها من امبارح، وابو حسام قال لحاله ما انسحب اليوم واطلع بياض وجهي وبكفيني العشرين الف ليرة الي خسرتهن وبلاش اخسر لي كمان شوي زيادة، الولاد اولى في المصاري.

× طيب كيف عرف ابو حسام انو الحكومة باعتها؟

 

* هاظ يا سيدي، بقولوا، والعلم عند الله، انو الحكومة راح تغيير الصناديق، والله هيك الي قاله ابو حسام وهو سمعه من ناس كبار، فوق فوق. ترى يا استاذ محمد، سواء نجح فلان والا علان ما هم شو بدهم يعملولنا.

يتابع ابو نعيم: وبعدين ما هو كله عند العرب صابون، والقاري والـ… واحد، وزيت الحكومة في طحينها، والشغلة مبينة من اول، زي ما بقول المثل هاي ذانك يا جحا.

× بس الشغلة مش هيك يا ابو نعيم، يعني في ناس منيحين وفي الاسلاميين وفي غيرهم؟؟

* صحيح انت صحفي يا استاذ محمد بس والله ما انت عارف وين الله حاطك، الحكومة والنواب طابخينها ومخلصين، ما هي معروفة ومبينة زي عين الشمس، والطبخة انحرقت وفاحت ريحتها.

يتابع: وبعدين احنا شو دخلنا، هاي الحكومة والنواب بتقاتلوا على الكراسي واحنا الشعب ما حد داري فينا، واذا الواحد حكى الحق بتنخزق طاقيته.

×  بس يا ابو نعيم هياتك بتحكي وما حد جاي فيك؟

* شو الفايدة اني احكي، ما هو زي ما بقول المثل يا داخل بين البصلة وقشرتها ما نابك الي ريحتها، هذا الي بيجينا من الديمقراطية الي بحكو عنها، هاي ديمقراطية هاي، هاي على قولة المثل من برة رخام ومن جوا سخام.

× بتابع ابو نعيم: بعدين تعال لقولك لا نبعدها ولا نقربها، قلتلك كل عند العرب صابون يعني نجح فلان ولا فلان شو بنوبنا، اذا الواحد حكى ما حد بسمع، بتقول ثور بقولوا حلبوه، وصرنا شايفين اكم حكومة، وحده رايحة وحدة جاي، ونواب رايحين ونواب جايين وكلهم واحد، لبنة وزيت وزيت ولبنة. بعدين هالمرشحين ما طلعت ريحتهم زي علبة السردين لما تفتحها.

* يا ابو نعيم …؟؟

×  شو اي ظل فيها ابو نعيم، بنقولك مبيوعة والناس الي ناجحين صاروا عاملين عرس ومش مستنين عرس بكره، والي رايح يصير بكره كله علشان يقولوا للناس برة انو احنا ديقمراطيين بس شو الفايدة ما هي مبينة وكله ع السكين يا بطيخ وعلى عينك يا تاجر، وهالمرشحين عاملين فيها زي حسبة الخضرة على اونا على دووه، وعاملينها مثل شلية فجل.

*  شو الفايدة يا عمي، والله ابو حسام خسارة عليه، زلمة غانم، بس يا عمي ما بدههم زلم غانمين، بدهم زلم تهز راسها (آمين)، يا استاذ محمد قولنا لك في بلادنا كله عند العرب صابون، المنيح بروح في عروى العاطل، والقبيح ما خلا للصالح محل، وهاي كفي وهاي كفي.

ابو نعيم يختم: والله ابو حسين، الله يطولنا بعمره ويحمي شبابه، لو يوقف هالمهزلة، ويلغينا هالانتخابات، احسن ما يظلوا يبيعوا ويشتروا فينا زي لو كأنو الشعب سحارة بندورة.

* بالمناسبة تحليل أبو نعيم السياسي هذا يصلح ايضا للنشر في جريدة يومية محترمة بقلم كاتب او مفكر ناهض أو مخضرم محترم وان بصياغة اخرى، وكذلك لغة الدكنجي وتعابيره واستخدامه كمصدر للأخبار عادة عند صحفيين كثر في بلادنا.

 

بواسطة mohomar 19:51 | ليست يوميات...! | تعليق(0) | الرابط الثابت