الاسم: mohammad omar

تجليط...!

08 ايار, 2008

من بدع "اللغة اللبنانية" التي يطالب الشاعر سعيد عقل ان تعمم على العالم. مفردات من مثل كلمة "تجليط". صعب اني اعطي معنى دقيق للكلمة، بس يمكن يكون معناها اقرب لـ"الفلهوة" او الكذب او التكاذب او التذاكي...

 المهم...

استيقظت منذ الساعة الخامسة صباحا في غرفة فندقي الفخم في شارع الحمرا، وكان اول غيث حصار بيروت ان المياه في الاوتيل تكاد تنقطع او هي الان انقطعت، معلش تحممت بالزور ، يادوب لحقت اشيل الشامبو...

غاب عن الافطار ايضا الكثير من الاشياء "الطيبة الزاكية" خاصة الخضرة لانه كثير من الطرق بعدها مقطوعة، فانصار المعارضة اغلقوا طريق المطار والطريق المؤدي الى جنوب لبنان، واغلقوا طريق الميناء لمدة ساعات...

اما انصار السلطة او تيار المستقبل التابع للسيد سعد الحريري فقد اغلقوا الطريق الدولي المؤدي الى دمشق طوال الليل حتى قام الجيش بفتحها...

طيب...

من شي الساعة 7 الصبح للساعة 8 وانا اسمع اخبار، سمعت كل اخبار الفضائيات وبعدين نزلت على الشارع، على الكشك اللي جنب الفنديق واشتريت صحف "الحياة" و"السفير" و "النهار" و "الاخبار" و "المستقبل" ورجعت على الاوتيل، اتناول، حلوه هاي، افطاري واقرأ الصحف...

بصراحة...

حتى تعرف شو عم يصير في البلد لازم تشوف كل الفضائيات اللبنانية وتسمع كل الاذاعات، وعددها مش قليل طبعا، وتقرأ كل الصحف... لانه كل الاعلام اللبناني بدون استثناء غير مستقل... والكل ، صحافيين وسياسيين "بجلطوا" ع الشعب...

صعب انك تعرف أي رواية هي الاصدق واي صحفي هو الاصدق واي سياسي يمتلك مصداقية..

حملت حالي ونزلت ماشي على خط التماس الجديد، وهو "كورنيش المزرعة"، الشارع الذي شهد امس اعنف الاشتباكات بالايدي ومرات بالاسلحة وباطلاق قذائف البي 7 والقنابل الصوتية . وقريب من الكورنيش في منطقة اسمها "النيويري" صار اشتباك حامي واحرق مكتب لتيار المستقبل...

ما علينا...

في الحرب الاهلية ، لمّا كنت ببيروت كانت "خطوط التماس" تقسم بيروت غربية وشرقية، هلا خط التماس الجديد على كورنيش المزرعة، بقسم بيروت شمالية جنوبية...

كورنيش المزرعة للان مغلق، وزعران الاحزاب والتيارات، وكلهم شباب صغار ، الكبير فيهم ما بتعدى عمره الخمسة وعشرين سنة، مستنفرين ونازلين حرق حاويات زبالة واطارات وشاحنات المعارضة بعدها بتنقل رمل وصخور لاغلاق الشارع...

يعني طريق المطار مثلا اذا كان فيه امل تفتح او يكون فيها ثغرة اليوم ما عاد فيها ولا ثغرة...

الحركة في بيروت كثير هادئة، وزعيم الاتحاد العمالي اعلنها اضراب مفتوح لا بل عصيان مدني، وجماعة المعارضة السياسية، يقولون انها انتفاضة تأييد لـ"اسد المطار" والمقصود طبعا باسد المطار هو رئيس جهاز امن المطر العقيد امين شقير ، الشيعي اللبناني، الذي اصدر مجلس الوزراء اول امس قرارا بابعاده عن المطار ونقله الى الجيش اضافة الى قرارات اخرى منها ملاحقة "شبكة الاتصالات الهاتفية" الموازية لحزب الله وتجريم كل من يعمل على مد هذه الشبكة.. ومفتي السنة اعلنها امس حربا "مذهبية" وقال انه المسلمين السنة نفذ صبرهم" وما عاد فيهم يتحملوا...

صحفيو لبنان وسياسيوه كلهم اليوم نازلين بحملة "تجيلط" السفير بتقول انه قرارات مجلس الوزراء كانت بمثابة اعلان حرب اهلية. وصحيفة النهار اتهمت المعارضة بحرق البلد، وعلى هاتين الصحيفتين، فيك تقيس كل الاعلام اللبناني عليهن، الكل بجلط والكل بتهم الكل والكل ما بدو يرجع للحرب الاهلية بس الكل بغذي بالحرب الاهلية.. لكل بقول عن الحرب" تنزكر وما تنعاد" بس يبدو انه الكل بجلط على الكل واعتقد ما في حد هون، متل ما في بكل الوطن العربي واحد قراراه بايدو من الافراد الى الدول.

اليوم كلنا بنستنى السيد حسن نصرالله يحكي على الساعة 11 حتى نعرف شو افق هاي التحركات...

بس جماعة 14 اذار هددت من امبارح انها ما راح تسكت هاي المرة...

الكل بتهم الكل، حد بحكي انه الاضراب سياسي وانه المستهدف الدولة اللبنانية وناس بتحكي انه الاضراب من اجل لقمة الخبز وانه السلطة مستهدفة الفقراء والمقاومة... وطبعا الكل معه حق لانه هاد الطرف مع "الدولة" وهاد الطرف مع "المقاومة"، بس ما في حد من الاطراف مع الانسان.. لانه مش مهم..

مو هو هاد لبنان الي قالت فيه فيزور المحاصرة في المطار حتى ساعة متاخرة من الليل مع فريقها اللي كان راجع من الشارقة  انه "الي بندفع حقه ناس مش اغلى من  الناس". بس للاسف هون في لبنان وفي كل الوطن العربي كل شي اغلى من الانسان، الحجر والقضية والزعامات والافكار والمفاهيم والدين والله اغلى من الناس...

نحنا العرب بنخلق الاشياء والافكار والزعامات والمفاهيم والديانات وبنصير عبيد الها...

السفيران السعودي والايراني، دخلوا اللعبة والاتصالات بينهم شغالة، السفير السعودي طلب من الايراني يدخل عند المعارضة ، والمعارضة ردت بالقول انه ما راح توقف حتى يتراجع السنيورة ومجلس الوزراء عن قراراته بما فيها القرار الخاص باسد المطار. والحكومة ردت انها ما راح تتراجع..

وزعيم الاتحاد العمالي بعدو مصر انه التحركات هاي او "الاضراب" هو من اجل "لقمة العيش"... والحكومة بتقول انها ما راح تتراجع عن قراراتها. وعمرو موسى بقول انه الوضع صعب بس فيه ضوء باخر النفق، الله يرحم عرفات ونفقه الي ولا شاف ضوء ولا حت بصيص امل..لانه المرحوم عرفات كان كل الحرب في لبنان يقول "ارى ضوءا في اخر النفق"...

الكل بقول انه الاضراب نجح والكل بقول عكس ذلك، طبعا مستحيل تعرف مين الصح ومين الغلط، لانه الناس هون اما متحزبين او مرعوبين او يأسانين... الكل بدو يروح على الشغل وخايف والكل بده يروح على المسيرات والاعتصامات والطرق كثير منها مغلق...

ما بحكي على الشعب اللبناني، ابدا ، بس بحكي على صحافته وسياسييه، الكل بجلط على الكل، والكل عم يستغل حاجة الناس وبحزبها وبعمل مليشيات ومقاتلين وببيع اعلام تجليط..

شفت الصبح كثير من المظاهر الي بتخلي الواحد يتذكر الحرب الاهلية الي مفترض تنزكر وما تنعاد.

شباب يلبسون الاسود، مسلحين يتخفون باقنعة سوداء يحلمون رشاشات كلاشينكوف "جديدة لنك" كانها طالعة امبارح من الكرتونة وبعدها بشحمتها...

شباب "مدنيون" يحرسون مقرات صحف واحزاب . لكن يبدو ان اسحلتهم "الجديدة لنك" مخفية بمحل ما قريب من تجمعهم...

انا "هلا" بمقهى يونس، امامي الحمرا سنتر" بعده شاهد على بعض مآسي الحروب، لانه مبنى مش بس مهجور بل اثار الرصاص بادية في بعض جدرانه، ومع ذلك كل الناس على المقهى بتحكي بالوضع السياسي...

وطبعا شارع الحمرا مغلق تقريبا، اغلب الناس خايفين، او يعضهم مش قادر يصل محل عمله...

ما بعرف اذا اليوم راح يفتح طريق المطار، بعد كلمة نصرالله، واقدر اروح على الاردن، بس في كل الاحوال فان الامم المتحدة التي استضافتنا تفكر بنقلنا الى دمشق ومن هناك كل واحد بروح على بلده...

اليوم قرأت في الاخبار، انه حزب جبهة العمل الاسلامي في الاردن بهدد باستخدام "الشارع"، جماعة "الشارع" هادول ، الناس الي كل ما دق الكوز بالجرة بهددونا بالشارع وبتحريك الرعاع والدهماء والغوغاء والشبيبة الصغار المكبوتين والمقموعين سياسيا وعاطفيا وجنسيا، يستحوا شوي على دمهم لانه لما البلد بتضيع وبتنحرق متل ما عم بصير هون وفي العراق الشقيق ورام الله وغزة وقتها ما راح تنفع كل الشعارات عن "لقمة العيش" وعن "التحرير والنضال ضد الاعداء"...

جماعة الصوت العالي اللي عندنا، الناس هادول الي مش فارقة معهم شي غير انهم يهددوا، الناس هاي الي عامله زي السياسيين اللبنانيين الي متخبين في الفنادق الخمس نجوم و في الفلل الخمس نجوم في الجبل والشوف وعاليه وزغرتا وغيرها والزعامات المتخبية في ملاجيء خمس نجوم.. تستحي شوي على حالها وتتركنا نعيش لانه اولادنا مش فدا صرامية حد لانه لما نخسر البلاد والعباد مش راح ينفع بعدين نفتش عن لقمة خبز...

حاجتكم تجليط  و فهلوة علينا، وانتم كلكم لا تنطقون عن "الهوى" ان هو الا وحي يوحى اليكم من عواصم ومراكز مخابرات... وعاملين علينا زعامات وحكي فاضي زهقنا وقرفنا حروب باسمنا وباسم قضايانا وزهقنا متاجرة باسم خبزنا وبلادنا وديننا وعقائدنا واشتراكيتنا وليبراليتنا...وكل الحكي الماسخ...

الله يستر...

بواسطة mohomar 09:21 | ليست يوميات...! | تعليق(7) | الرابط الثابت